«Tottenhem» va Braziliya milliy jamoasi hujumchisi Risharlison sevgilisi Amanda Araujoga turmush qurishni taklif qildi. Futbolchining taklifi ijobiy qabul qilindi va juftlik unashtirildi.
Marosim Londondagi mashhur The Shard osmono‘parida joylashgan Shangri-La mehmonxonasida o‘tkazildi. Risharlison bu lahza uchun maxsus romantik muhit tayyorlatgan: xona shamlar, atirgul yaproqlari va yurak shaklidagi bezaklar bilan jihozlangan.
Amanda ijtimoiy tarmoqda unashtiruv marosimidan suratlarni e’lon qilib, qisqa izoh qoldirdi:
«Men “ha” dedim».
Uning sahifasini 1,5 milliondan ortiq foydalanuvchi kuzatib boradi. Amanda model va inflyuyenser sifatida ham tanilgan.
Juftlikning tanishuv tarixi ham qiziq. Amanda avvalroq bergan intervyusida Risharlison bilan 2019 yilda PUBG Mobile o‘yini bo‘yicha musobaqa vaqtida tanishganini aytgan. Ular dastlab internet orqali muloqot qilgan, 2022 yilda esa ilk bor yuzma-yuz uchrashgan. Keyinchalik munosabatlarini rasman boshlagan.
2025 yil iyunda Risharlison va Amanda farzandli bo‘ldi. O‘g‘ilga otasining sharafiga Risharlison Junior deb ism qo‘yilgan.
Risharlison shaxsiy hayotidagi muhim voqeani yangi futbol mavsumi boshlanishi arafasida nishonladi. «Tottenhem» 2026/27 yilgi Premyer-ligadagi ilk uchrashuvini 22 avgust kuni «Brentford»ga qarshi o‘tkazadi.
