Madridning «Atletiko» klubi ishqibozlari «Barselona»ga o‘tish istagini bildirgan hujumchi Xulian Alvaresga qarshi norozilik aksiyasi uyushtirishdi. muxlislar klub rahbariyatini argentinalik futbolchidan tezroq qutulishga chaqirishmoqda.
Juma kuni ertalab madridliklarning mashg‘ulot bazasi yaqinida Alvares to‘p suradigan 19-raqam ustidan chizilgan plakat paydo bo‘ldi. Boshqa bir lavhaga esa: «Xulian, yo‘qol!» deb yozib qo‘yilgan.
Oldinroq «Atletiko» muxlislari La Liganing 1-turidan o‘rin olgan «Malaga»ga qarshi o‘yinda (2:0) ham Alvares sha’niga haqoratli hayqiriqlar aytishgan edi. Argentinalik futbolchi ushbu bahs qaydnomasiga kiritilmagan edi.
