Angliya Premyer-ligasi tarixida har bir o‘yinga o‘rtacha eng ko‘p ochko to‘plagan murabbiylar reytingi taqdim etildi. Kamida 50 ta uchrashuv o‘tkazgan mutaxassislar orasida Pep Gvardiola yetakchilik qilmoqda.
Taqdim etilgan statistikaga ko‘ra, «Manchester Siti» sobiq bosh murabbiyi APLda har bir o‘yinga o‘rtacha 2,28 ochko to‘plagan. Premyer-liganing rasmiy saytida ham Gvardiolaning ushbu ko‘rsatkich bo‘yicha tarixda birinchi o‘rinda ekani qayd etilgan.
Ikkinchi pog‘onada «Manchester Yunayted» afsonasi ser Aleks Fergyuson joylashgan — 2,16 ochko. Shotlandiyalik mutaxassis APLda 810 ta uchrashuvda jamoasini boshqarib, 528 ta g‘alabaga erishgan. Eng muhimi, u «Manchester Yunayted» bilan Premyer-ligada rekord darajada — 13 marta chempion bo‘lgan.
Kuchli uchlikni Yurgen Klopp yakunlab bergan. «Liverpul»dagi faoliyati davomida nemis mutaxassisi har bir o‘yinga o‘rtacha 2,11 ochko jamg‘argan.
Eng yaxshi beshlik:
1. Pep Gvardiola — 2,28 ochko
2. Aleks Fergyuson — 2,16 ochko
3. Yurgen Klopp — 2,11 ochko
4. Roberto Manchini — 2,05 ochko
5. Antonio Konte — 2,03 ochko
Roberto Manchini va Antonio Konte ham Angliyada chempionlikka erishgan murabbiylar hisoblanadi. Manchini «Manchester Siti»ni 2011/12 yilgi mavsumda tarixiy chempionlikka olib kelgan bo‘lsa, Konte 2016/17 yilgi mavsumda «Chelsi» bilan Premyer-ligada g‘olib chiqqan.
E’tiborlisi, kuchli beshlikdagi barcha murabbiylar APL chempioni bo‘lgan. Biroq o‘rtacha to‘plangan ochkolar bo‘yicha Gvardiola hatto turnir tarixidagi eng sovrindor murabbiy Fergyusondan ham oldinda.
