Buyuk Britaniya kelajakda futbol bo‘yicha jahon chempionatini qabul qilish uchun ariza topshirish imkoniyatini ko‘rib chiqmoqda. Bosh vazir Endi Byornem ushbu tashabbusni qo‘llab-quvvatlamoqda va Angliya futbol assosiasiyasi hamda Premyer-liga bilan bu borada muzokara olib bormoqda.
The Sun ma’lumotiga ko‘ra, jahon chempionatini o‘tkazish orqali mamlakatga qo‘shimcha investisiyalar va sayyohlarni jalb qilish, shuningdek, hududlarda infratuzilmani rivojlantirish rejalashtirilmoqda. Musobaqa o‘yinlarini Buyuk Britaniyaning bir nechta shaharlarida tashkil etish, "Uembli" stadioniga esa final bahsini berish imkoniyati ko‘rib chiqilmoqda.
Ayrim xabarlarda 2038 yoki 2042-yilgi turnir tilga olingan bo‘lsa-da, The Times ma’lumotiga ko‘ra, amaldagi FIFA qoidalari saqlanib qolsa, Buyuk Britaniya qabul qilishi mumkin bo‘lgan eng yaqin jahon chempionati 2042-yilgi turnir bo‘ladi.
Angliya so‘nggi bor 1966-yilda jahon chempionatiga mezbonlik qilgan. O‘shanda mezbonlar finalda G‘arbiy Germaniyani qo‘shimcha vaqtda 4:2 hisobida mag‘lub etib, tarixida ilk va hozircha yagona bor jahon chempioni bo‘lgan.
Shuningdek, Buyuk Britaniya va Irlandiya 2028-yilgi Yevropa chempionatiga mezbonlik qiladi. 2030-yilgi JCHning asosiy o‘yinlari Ispaniya, Portugaliya va Marokashda, 2034-yilgi musobaqa esa Saudiya Arabistonida o‘tkaziladi.
