Malayziyaning "Johor Darul Ta’zim" klubi milliy chempionatda mag‘lubiyatsiz o‘tkazilgan o‘yinlar soni bo‘yicha yangi jahon rekordini o‘rnatdi.

Yangi mavsumning ilk turida "Johor" "Kuching Siti"ni 3:0 hisobida mag‘lub etdi. Shu tariqa jamoaning Malayziya chempionatidagi mag‘lubiyatsiz seriyasi 109 ta o‘yinga yetdi. "Johor" 2021 yil aprelidan buyon milliy chempionatda mag‘lub bo‘lmagan.

Avvalgi jahon rekordi Kot-d'Ivuarning "ASEK Mimozas" klubiga tegishli edi. Afrika jamoasi 1989-1994 yillar oralig‘ida chempionatda ketma-ket 108 ta uchrashuvda mag‘lubiyatga uchramagan.

"Johor" esa 32 yildan buyon saqlanib kelgan ushbu rekordni yangiladi va endi o‘zining tarixiy seriyasini yanada uzaytirishni maqsad qilgan.