"Barselona" yozgi transfer oynasi yakunlanguniga qadar yangi markaziy himoyachi xarid qila olmasa, Andreas Kristensenga ko‘proq imkoniyat berishni rejalashtirmoqda.

Marca ma’lumotiga ko‘ra, so‘nggi ikki mavsumda jarohatlar daniyalik futbolchining muntazam o‘ynashiga to‘sqinlik qildi. Shunga qaramay, kataloniyaliklar yozda uning shartnomasini uzaytirib, futbolchining texnik imkoniyatlariga ishonch bildirdi.

Kristensen mavsumoldi tayyorgarlik jarayonida yaxshi taassurot qoldirgan va nazorat uchrashuvlaridagi ishonchli harakatlari bilan murabbiylar shtabi ishonchini qozongan.

Ayni paytda "Barselona" yangi markaziy himoyachi masalasida qaror qabul qilishi kerak. Ronald Arauxoning ketishi va Erik Garsiyaning doimiy ravishda o‘ng qanot himoyachisi sifatida ishlatilishi markazda yangi futbolchiga ehtiyojni oshirgan.

Biroq klubning bu pozisiyani kuchaytirishi yangi markaziy hujumchi transferiga ham bog‘liq. Agar "Barselona" yangi "9-raqam" uchun katta mablag‘ sarflasa, markaziy himoyachi xarid qilish imkoniyati sezilarli darajada kamayadi.

Shunday vaziyatda 30 yoshli Kristensen ichki yechim sifatida ko‘rilmoqda. U yangi mavsumda avvalgi yillarga nisbatan ko‘proq o‘yin amaliyotiga ega bo‘lishi mumkin.