Saudiya Arabistoni Pro-ligasining 2-turidan o‘rin olgan «Al-Ahli» — «Abha» uchrashuvi yakunlandi. Jidda shahridagi «King Abdulla Sports Siti» stadionida kechgan bahsda mezbonlar 4:0 hisobida yirik g‘alaba qozondi.

5-daqiqada angliyalik hujumchi Ayven Touni hisobni ochdi. Unga «Krasnodar»ning sobiq futbolchisi Eduard Spersyan golli uzatma berdi. 13-daqiqada Touni penaltidan unumli foydalanib, o‘zining ikkinchi golini urdi.

51-daqiqada portugaliyalik Fransishku Trinkau jamoasining uchinchi goliga mualliflik qildi. 57-daqiqada Touni yana bir bor darvozani ishg‘ol etib, xet-trikni rasmiylashtirdi.

«Al-Ahli» avvalgi turda «Al-Dir’iya»ni mag‘lub etgandi. O‘sha uchrashuvdagi yagona golni Spersyan kiritgan.

Ikki turdan keyin «Al-Ahli» hisobida olti ochko mavjud. «An-Nasr», «Al-Hilol», «Al-Ittifoq» va «Neom» jamoalari ham shuncha ochko to‘plagan.