«Bavariya» bosh murabbiyi Vensan Kompani Germaniya Superkubogi doirasida Dortmundning «Borussiya» klubi ustidan qozonilgan 2:1 hisobidagi g‘alabadan so‘ng fikrlarini bildirdi.

Myunxenliklar Nataniel Braun va Maykl Olisenig 28 hamda 45-daqiqalarda urgan gollari evaziga g‘alaba qozondi. Dortmundliklarning yagona javob golini 75-daqiqada Fabiu Silva kiritdi.

«G‘alabadan juda mamnunman. Olise va Keyn ta’tildan qaytgach, bor-yo‘g‘i uch marta mashg‘ulot o‘tkazishga ulgurgandi. Shunga qaramay, ular maydonda 90 daqiqa harakat qildi.

Biz futbol o‘ynagan davrda ta’tildan uch-to‘rt kilogramm ortiqcha vazn bilan qaytardik. Hozir esa futbolchilarning shaxsiy murabbiylari bor. Shuning uchun ular mavsumga tayyorgarlikni ajoyib jismoniy holatda boshlaydi.

Nene, ya’ni Nataniel Braun hamda Saybari bu mavsum bizga katta foyda keltiradi. Keyinroq safga qaytishi kutilayotgan Lenni, ya’ni Lennart Karl, Musiala va Gnabri ham bor.

Bugun jamoa katta kuch va shijoat bilan harakat qildi, har bir to‘p uchun kurashdi. Ayrimlar o‘tgan mavsumdagi muvaffaqiyatdan keyin natijalarimiz pasayishini kutayotgan bo‘lishi mumkin. Ammo biz qo‘lga kiritilgan yutuqlar bilan cheklanib qolmaymiz va barcha sovrinlarni yutishga harakat qilamiz», — deya Kompani so‘zlarini Bayern & Germany nashri keltirdi.

«Bavariya» 28 avgust kuni Bundesliganing yangi mavsumini «Shtutgart»ga qarshi uy uchrashuvi bilan boshlaydi.