«Lasio»ning sobiq ispaniyalik yarim himoyachisi Luis Alberto professional faoliyatini yakunlagan Chiro Immobile haqida fikr bildirdi. Italiyalik hujumchi faoliyati davomida to‘rt marta A Seriyaning eng yaxshi to‘purari bo‘lgan.
Luis Alberto bir necha yil davomida «Lasio»da birga to‘p surgan sobiq jamoadoshiga yuksak baho berdi.
«Birgalikda o‘tkazgan ajoyib lahzalarimiz hech qachon unutilmaydi — biz haqiqatan ham juda yaxshi vaqt o‘tkazdik. Klub timsoliga aylangan futbolchi bilan bir maydonda to‘p surish ajoyib edi. Chiro — afsona va u abadiy afsona bo‘lib qoladi. O‘sha jamoa katta muvaffaqiyatlarga erishdi», — dedi Luis Alberto.
Eslatib o‘tamiz, 36 yoshli Immobile Fransiyaning «Parij» klubidagi mavsumidan so‘ng futbolchilik faoliyatini yakunladi. Uning professional futboldagi faoliyati 17 yil davom etdi.
