Rimning «Lasio» klubi hujumchi Andrea Pinamontini o‘z safiga qo‘shib olish bo‘yicha «Sassuolo» bilan yangi raund muzokaralarini o‘tkazadi. Rimliklar futbolchini sotib olish huquqi bilan ijaraga olishni taklif qilmoqda.

Ma’lumotlarga ko‘ra, «Lasio» futbolchining o‘zi bilan shaxsiy shartnoma shartlari bo‘yicha allaqachon kelishib olgan. Biroq klublar o‘rtasida transfer summasi va uni sotib olish shartlari bo‘yicha muhokamalar davom etmoqda. «Sassuolo» ma’lum shartlar bajarilgan taqdirda futbolchini majburiy tarzda sotib olish bandini kiritishni talab qilmoqda, rimliklar esa hozircha faqat sotib olish opsiyasi tarafdori.

O‘tgan mavsumda 27 yoshli hujumchi barcha turnirlarda 37 ta o‘yin o‘tkazib, 9 ta gol urdi va 4 ta golli uzatmani amalga oshirdi.

Eslatib o‘tamiz, «Lasio» yangi mavsumni bugun, 24 avgust kuni A Seriyaning birinchi turi doirasida safarda «Bolonya»ga qarshi o‘yin bilan boshlaydi.