Римнинг «Лацио» клуби ҳужумчи Андреа Пинамонтини ўз сафига қўшиб олиш бўйича «Сассуоло» билан янги раунд музокараларини ўтказади. Римликлар футболчини сотиб олиш ҳуқуқи билан ижарага олишни таклиф қилмоқда.

Маълумотларга кўра, «Лацио» футболчининг ўзи билан шахсий шартнома шартлари бўйича аллақачон келишиб олган. Бироқ клублар ўртасида трансфер суммаси ва уни сотиб олиш шартлари бўйича муҳокамалар давом этмоқда. «Сассуоло» маълум шартлар бажарилган тақдирда футболчини мажбурий тарзда сотиб олиш бандини киритишни талаб қилмоқда, римликлар эса ҳозирча фақат сотиб олиш опцияси тарафдори.

Ўтган мавсумда 27 ёшли ҳужумчи барча турнирларда 37 та ўйин ўтказиб, 9 та гол урди ва 4 та голли узатмани амалга оширди.

Эслатиб ўтамиз, «Лацио» янги мавсумни бугун, 24 август куни А Сериянинг биринчи тури доирасида сафарда «Болонья»га қарши ўйин билан бошлайди.