UEFA prezidenti Aleksander Cheferin JCH-2026 vaqtida AQSH terma jamoasi hujumchisi Folarin Balogunning diskvalifikasiyasi to‘xtatib turilganidan shokka tushganini ma’lum qildi.
Balogun Bosniya va Gersegovinaga qarshi 1/16 final uchrashuvida (2:0) Tarik Muharemovichning to‘pig‘ini bosib olgani uchun qizil kartochka olgandi. Keyinchalik futbolchining bir o‘yinlik diskvalifikasiyasi bir yillik sinov muddati bilan to‘xtatib turildi. Natijada u Belgiyaga qarshi 1/8 final bahsida (1:4) maydonga tushish imkoniyatiga ega bo‘ldi.
AQSH prezidenti Donald Tramp keyinchalik ushbu vaziyatni FIFA prezidenti Janni Infantino bilan muhokama qilganini aytgandi.
«Bu, yumshoq qilib aytganda, shok holati. Bizda qoidalar bor. Agar o‘z qoidalaringizga rioya qilmasangiz, o‘yin butunlay o‘z ma’nosini yo‘qotadi.
Yevropadan tashqaridagi ayrim federasiyalar hukumat aralashuvi sababli chetlatilgan. Endi esa bir mamlakat prezidenti: "Men unga [Infantinoga] qo‘ng‘iroq qilib, bu masalani ko‘rib chiqishini aytdim", deydi. Keyin FIFA prezidenti: "Bu mustaqil qaror edi", deydi. Bu bizni ham futbol muxlisi, ham boshqaruv organi sifatida shokka soldi.
Ishoning, deyarli hamma shokda edi. Faqat hamma ham bu haqda ochiq gapirishga jur’at eta olmadi», — dedi Cheferin The Rest Is Politics podkastida.
Shuningdek, Cheferindan nima uchun AQSHdagi jahon chempionati o‘yinlariga bormagani so‘raldi.
«Bormaslikka qaror qilishimning ko‘plab sabablari bor edi. Bu to‘g‘ri qaror bo‘lishini bilardim», — dedi UEFA rahbari.
