УЕФА президенти Александер Чеферин ЖЧ-2026 вақтида АҚШ терма жамоаси ҳужумчиси Фоларин Балогуннинг дисквалификацияси тўхтатиб турилганидан шокка тушганини маълум қилди.
Балогун Босния ва Герцеговинага қарши 1/16 финал учрашувида (2:0) Тарик Муҳаремовичнинг тўпиғини босиб олгани учун қизил карточка олганди. Кейинчалик футболчининг бир ўйинлик дисквалификацияси бир йиллик синов муддати билан тўхтатиб турилди. Натижада у Бельгияга қарши 1/8 финал баҳсида (1:4) майдонга тушиш имкониятига эга бўлди.
АҚШ президенти Дональд Трамп кейинчалик ушбу вазиятни ФИФА президенти Жанни Инфантино билан муҳокама қилганини айтганди.
«Бу, юмшоқ қилиб айтганда, шок ҳолати. Бизда қоидалар бор. Агар ўз қоидаларингизга риоя қилмасангиз, ўйин бутунлай ўз маъносини йўқотади.
Европадан ташқаридаги айрим федерациялар ҳукумат аралашуви сабабли четлатилган. Энди эса бир мамлакат президенти: "Мен унга [Инфантинога] қўнғироқ қилиб, бу масалани кўриб чиқишини айтдим", дейди. Кейин ФИФА президенти: "Бу мустақил қарор эди", дейди. Бу бизни ҳам футбол мухлиси, ҳам бошқарув органи сифатида шокка солди.
Ишонинг, деярли ҳамма шокда эди. Фақат ҳамма ҳам бу ҳақда очиқ гапиришга журъат эта олмади», — деди Чеферин The Rest Is Politics подкастида.
Шунингдек, Чефериндан нима учун АҚШдаги жаҳон чемпионати ўйинларига бормагани сўралди.
«Бормасликка қарор қилишимнинг кўплаб сабаблари бор эди. Бу тўғри қарор бўлишини билардим», — деди УЕФА раҳбари.
