O‘zbekiston Superligasining 19-turidan o‘rin olgan "Qo‘qon-1912" va "Buxoro" jamoalari o‘rtasidagi uchrashuv 1:1 hisobidagi durang bilan yakunlandi.

Qo‘qondagi "Markaziy" stadionida o‘tkazilgan bahsning birinchi bo‘limida hisob ochilmadi.

Ikkinchi bo‘lim boshida mezbonlar oldinga chiqib olishdi. 49-daqiqada belgilangan penaltini Javohir Sidiqov aniq amalga oshirib, "Qo‘qon-1912"ni hisobda oldinga olib chiqdi — 1:0.

Uchrashuvning 88-daqiqasida "Buxoro" futbolchisi Sardor Qulmatov ikkinchi sariq kartochkani olib, maydondan chetlatildi. Shunga qaramay, mehmonlar bir kishi kam bo‘lib qolgan holda mag‘lubiyatdan qutulib qolishdi.

90+2-daqiqada Shahzodbek Ubaydullayev jarimadan chiroyli gol urib, hisobni tenglashtirdi — 1:1.

Shu tariqa, "Qo‘qon-1912" so‘nggi daqiqalarda g‘alabani qo‘ldan chiqardi, "Buxoro" esa safardan bir ochko bilan qaytdi.