«Atletiko» muxlislari jamoa hujumchisi Xulian Alvaresning «Barselona»ga o‘tish istagidan norozi.
La Liga doirasida «Vilyarreal»ga qarshi kechgan va 2:2 hisobida yakunlangan uchrashuvda «Metropolitano» tribunalari argentinalik futbolchini hushtakbozlik bilan qarshi oldi.
Jurnalist Renso Pantich ma’lumotiga ko‘ra, ayrim muxlislar hatto o‘yindan keyin Alvares tomon otish uchun yumshoq o‘yinchoq kalamushlar tayyorlab qo‘ygan. Biroq bu amalga oshmadi. Klub matbuot xizmati rahbari futbolchining oldiga borib, tribunalarga yaqinlashmasdan darhol kiyinish xonasiga kirib ketishini so‘ragan.
Shu sabab Alvares uchrashuvdan keyin jamoadoshlari bilan birga muxlislarga minnatdorlik bildirish uchun tribunalar oldiga bormagan.
«Atletiko» 26 yoshli hujumchini «Barselona»ga sotishni istamayapti. Shu bilan birga, Alvaresga Londonning «Arsenal» klubi ham jiddiy qiziqish bildirmoqda.
