«Атлетико» мухлислари жамоа ҳужумчиси Хулиан Альвареснинг «Барселона»га ўтиш истагидан норози.

Ла Лига доирасида «Вильярреал»га қарши кечган ва 2:2 ҳисобида якунланган учрашувда «Метрополитано» трибуналари аргентиналик футболчини ҳуштакбозлик билан қарши олди.

Журналист Ренсо Пантич маълумотига кўра, айрим мухлислар ҳатто ўйиндан кейин Альварес томон отиш учун юмшоқ ўйинчоқ каламушлар тайёрлаб қўйган. Бироқ бу амалга ошмади. Клуб матбуот хизмати раҳбари футболчининг олдига бориб, трибуналарга яқинлашмасдан дарҳол кийиниш хонасига кириб кетишини сўраган.

Шу сабаб Альварес учрашувдан кейин жамоадошлари билан бирга мухлисларга миннатдорлик билдириш учун трибуналар олдига бормаган.

«Атлетико» 26 ёшли ҳужумчини «Барселона»га сотишни истамаяпти. Шу билан бирга, Альваресга Лондоннинг «Арсенал» клуби ҳам жиддий қизиқиш билдирмоқда.