"Barselona" himoyachisi Jyul Kunde yangi mavsumda doimiy o‘yin amaliyotiga ega bo‘lmasligi mumkin.

Catalunya Radio ma’lumotiga ko‘ra, jamoa bosh murabbiyi Xans-Diter Flik fransuz futbolchisi bilan suhbatlashib, o‘ng qanot himoyasida asosiy variant sifatida Erik Garsiyani ko‘rayotganini bildirgan.

Shuningdek, Flik Kundedan ko‘proq markaziy himoyachi sifatida foydalanishni rejalashtirmoqda. Biroq 27 yoshli futbolchi bu pozisiyada ham birinchi tanlov hisoblanmaydi.

Transfer oynasi yopilguniga qadar Kundening "Barselona"ni tark etish ehtimoli ham muhokama qilinmoqda. Shu bilan birga, futbolchining o‘zi iyun oyida klubda qolish niyatida ekanini va shartnomasi 2030 yilgacha amal qilishini ta’kidlagan edi.