O‘zbekistonlik yarim himoyachi Umarali Rahmonaliyev to‘p surayotgan Ozarbayjonning "Sabah" klubi bugun, 25-avgust kuni UEFA Chempionlar ligasi umumiy bosqichi yo‘llanmasi uchun hal qiluvchi uchrashuvni o‘tkazadi.
Boku klubi saralash pley-off bosqichi javob bahsida Isroilning "Hapoel Beer-SHeva" jamoasini qabul qiladi. Uchrashuv Toshkent vaqti bilan soat 21:45 da boshlanadi.
Jamoalar o‘rtasidagi birinchi uchrashuvda "Hapoel Beer-SHeva" 2:1 hisobida g‘alaba qozongan. Shu bois "Sabah" umumiy bosqichga to‘g‘ridan-to‘g‘ri chiqish uchun javob bahsida kamida ikki to‘p farqi bilan g‘alaba qozonishi kerak. Bir to‘p farqidagi g‘alaba o‘yinni qo‘shimcha bo‘limlarga olib boradi.
UEFA ma’lumotlariga ko‘ra, Rahmonaliyev joriy Chempionlar ligasi saralashida 7 ta o‘yinda maydonga tushib, 588 daqiqa harakat qildi va 1 ta golli uzatma berdi. Uning paslar aniqligi 83 foizni tashkil etmoqda.
"Sabah" Chempionlar ligasi saralashini birinchi bosqichdan boshladi. Ozarbayjon klubi pley-offga qadar "Nyu-Seynts", "KuPS" va "Orxus" to‘siqlaridan o‘tdi.
Pley-off g‘olibi Chempionlar ligasining 36 jamoa ishtirok etadigan umumiy bosqichiga yo‘l oladi.
