"RB Leypsig" markaziy himoyachisi Kastello Lukeba yozgi transfer oynasi yakuniga qadar Germaniya klubini tark etishi mumkin.

Sky Sports ma’lumotiga ko‘ra, "Leypsig" 23 yoshli futbolchi uchun 45-50 mln yevro atrofida taklif tushsa, uni sotish imkoniyatini ko‘rib chiqishga tayyor.

Lukebaga "Barselona" qiziqish bildirmoqda. Avvalroq Ispaniya OAVlari kataloniyaliklar bosh murabbiyi Xansi Flik fransuz himoyachisini jamoa mudofaasini kuchaytirish uchun munosib nomzod deb hisoblayotgani haqida xabar bergandi. Flikka Lukebaning tezligi, jismoniy imkoniyatlari va hujumni orqa chiziqdan boshlashdagi mahorati ma’qul kelgani aytilmoqda.

"Barselona"ning markaziy himoyachi izlashi Ronald Arauxoning "Liverpul"ga ijaraga o‘tishi fonida yanada dolzarblashgan. Urugvaylik futbolchining Angliya klubi bilan kelishuvida 55 mln yevro atrofida sotib olish opsiyasi ham mavjud.

Kastello Lukeba "Leypsig"ga 2023 yilda "Lion"dan kelib qo‘shilgan va qisqa vaqt ichida jamoa asosiy tarkibidan joy olgan. Germaniya klubi 2024 yil oktyabrida uning shartnomasini 2029 yilgacha uzaytirgan.

Fransiyalik himoyachi asosan markaziy himoyaning chap tomonida harakat qiladi. U yuqori himoya chizig‘ida o‘ynash uchun zarur tezlikka ega ekani va to‘p bilan oldinga harakatlanishda samarali ekani bilan ajralib turadi.

Hozircha "Barselona" tomonidan "Leypsig"ga rasmiy taklif yuborilgani haqida ma’lumot yo‘q.