LASK Chempionlar ligasi saralashining pley-off bosqichi javob uchrashuvida «Seltik»ni qo‘shimcha vaqtda 5:1 hisobida mag‘lub etdi. Bahs Avstriyadagi «Rayffayzen Arena» stadionida bo‘lib o‘tdi.

Uchrashuvda hisobni 21-daqiqada shotlandiyaliklar yarim himoyachisi Kallum Makgregor ochdi. Oradan 11 daqiqa o‘tib, Moses Usor mezbonlarning javob golini urdi.

Ikkinchi bo‘lim boshida LASK yana ikki bor raqib darvozasini ishg‘ol qildi. Asosiy vaqt yakuniga yaqin esa zaxiradan maydonga tushgan Florian Fleker hisobni 4:1 ko‘rinishiga keltirdi.

Birinchi uchrashuvda «Seltik» 3:0 hisobida g‘alaba qozongani sababli, umumiy hisob tenglashdi va jamoalar 15 daqiqadan iborat ikki qo‘shimcha bo‘lim o‘tkazishdi.

109-daqiqada zaxiradan maydonga tushgan amerikalik hujumchi Samuel Adeniran LASKning beshinchi golini kiritdi. Oradan besh daqiqa o‘tib, u dubl qayd etishi mumkin edi, ammo penaltidan foydalana olmadi.

Shu tariqa, LASK ikki uchrashuv natijasiga ko‘ra 5:4 hisobida g‘alaba qozonib, Chempionlar ligasining umumiy bosqichiga yo‘l oldi. «Seltik» esa Yevropa ligasida ishtirokini davom ettiradi.