Portugaliyalik hujumchi Rafael Leau faoliyatini Turkiyada davom ettirish istagini bildirganiga qaramay, uning nomi Angliya Premyer-ligasi klublari bilan ham bog‘lanmoqda.
Ayni paytda asosiy da’vogarlardan biri sifatida italiyalik mutaxassis Roberto De Zerbi boshqarayotgan "Tottenxem" tilga olinmoqda.
derbyderbyderby.it ma’lumotiga ko‘ra, transferdagi asosiy masala "Milan"ning moliyaviy talabi bo‘lib qolmoqda. Italiya klubi Leau uchun 50 million yevrodan kam mablag‘ga rozi bo‘lish niyatida emas.
"Galatasaroy" varianti ham hali kun tartibida. Biroq portugaliyalik futbolchi uchun 35 million yevro taklif qilgan Turkiya klubi transferni amalga oshirishni istasa, taklif miqdorini sezilarli darajada oshirishi kerak bo‘ladi.
Eslatib o‘tamiz, Rafael Leau 2019 yildan beri "Milan" sharafini himoya qilib kelmoqda.
