«Barselona» bosh murabbiyi Xans-Diter Flik chap qanot himoyachisi Alexandro Balde bilan shaxsiy suhbat o‘tkazdi.

Nemis mutaxassisi yaqinda «Elche»ga qarshi o‘yin uchun ispaniyalik futbolchini qaydnomaga kiritmagan edi. Flik bu qarorni Balde transfer haqidagi gap-so‘zlar sabab futbolga to‘liq e’tibor qarata olmayotgani bilan izohlagan.

Jurnalist Pol Ballus ma’lumotiga ko‘ra, so‘nggi kunlarda bo‘lib o‘tgan shaxsiy suhbatda Flik Baldega uni hozircha zaxira futbolchisi sifatida ko‘rayotganini aytgan. Murabbiy asosiy tarkibda esa jamoaga qaytgan Joau Kanseluni sinab borishni rejalashtirmoqda.

Flik 22 yoshli himoyachini asosiy tarkibdagi o‘rni uchun qattiq mehnat qilishga chaqirgan. Qayd etilishicha, «Barselona» tarbiyalanuvchisi bu chaqiriqni qabul qilgan va murabbiylar shtabiga o‘z imkoniyatlarini isbotlashga tayyor.

Alexandro Baldega «Manchester Yunayted» qiziqish bildirmoqda. Futbolchining «Barselona» bilan amaldagi shartnomasi 2028 yilga qadar mo‘ljallangan.