«Atletiko» hujumchisi Xulian Alvares bugun ham jamoa bilan mashg‘ulot o‘tkazmadi, deb xabar berdi AS. Argentinalik futbolchi kecha ham kasalligi sababli mashg‘ulotda ishtirok etmagan edi.
Qayd etilishicha, futbolchi hanuz yaxshi holatda emas va uning shanba kuni «Sevilya»ga qarshi o‘yinda ishtirok etishi katta so‘roq ostida. Shu tariqa, Diyego Simeone hujum chizig‘ida yana qiyinchiliklarga duch keladi, chunki Aleksandr Syorlot hamon safdan tashqarida.
Alvaresning ehtimoliy transfer borasidagi vaziyati hamon noaniq. Avvalroq «Barselona» prezidenti Joan Laporta kataloniyaliklarning hujumchi bo‘yicha taklifi hali ham kuchda ekanini va «Atletiko»ning boshqa klublar bilan muzokara olib borayotganidan xabar topishganini tasdiqlagan edi.
«Atletiko» esa futbolchining kataloniyaliklar jamoasiga ketishiga qat’iyan qarshi ekanini yana bir bor ma’lum qildi. Vaziyatni hal qilishning ehtimoliy variantlaridan biri Xulianning «Arsenal»ga transferi bo‘lishi mumkin.
