Fabrisio Romano ma’lum qilishicha, Joel Ordonyes bugun «Kristal Pelas»da tibbiy ko‘rikdan o‘tadi. Bu uning «Bryugge»dan Angliya klubiga transferi yo‘lidagi hal qiluvchi bosqich hisoblanadi.

Italiyalik jurnalistning ta’kidlashicha, transfer tibbiy ko‘rik natijalariga bog‘liq bo‘ladi. Agar Ordonyes ko‘rikdan muvaffaqiyatli o‘tsa, u «Kristal Pelas»ning yangi markaziy himoyachisiga aylanadi.

«Burgutlar» futbolchi uchun taxminan 30 million yevro va bonuslar to‘lash bo‘yicha kelishuvga erishgan. Shu tariqa, klub Ordonyes uchun kurashda «Aston Villa»dan ustun keldi.

«Kristal Pelas» Maksim Lakruaning «Chelsi»ga ketishi va Chadi Riadning jarohat olishi ortidan himoya chizig‘ida tanqislikka duch kelgach, transfer ustida tezkor harakat qildi.

Ayni paytda Ordonyes oyog‘idagi muammo sabab maydondan tashqarida qolmoqda. Shu bois uning tibbiy ko‘rik natijalari alohida ahamiyat kasb etadi.

22 yoshli ekvadorlik himoyachi Belgiyada yorqin o‘yini bilan ajralib turdi. U «Bryugge» safida 120 dan ortiq uchrashuv o‘tkazib, Belgiya chempionati, mamlakat Kubogi va Superkubogini qo‘lga kiritgan.

Ordonyes klubdagi faoliyati davomida 7 ta gol urgan va 2 ta golli uzatmani amalga oshirgan.