«Liverpul»ning sobiq himoyachisi Jeymi Karrager to‘lanmagan soliqlar sabab Buyuk Britaniya Soliq va bojxona xizmati — HMRC tomonidan berilgan bankrotlik to‘g‘risidagi ariza ob’ektiga aylandi.

Ayni paytda Britaniyada Sky Sports, AQSHda esa CBS telekanallarida sharhlovchi va ekspert sifatida ishlayotgan Karrager HMRC da’vosidan so‘ng chorshanba kuni sudda ishtirok etdi.

Bankrotlik to‘g‘risidagi ariza qarz mablag‘larini undirish uchun sudga kiritiladigan rasmiy murojaat hisoblanadi. HMRC ma’lumotiga ko‘ra, bunday chora to‘lanmagan soliqlarni undirishda faqat eng oxirgi chora sifatida qo‘llanadi.

Soliq to‘lovchilar ma’lumotlarining maxfiyligiga oid qonun talablari tufayli HMRC alohida ishlarga izoh bermaydi. Biroq tashkilot The Athletic nashriga Karrager bilan bog‘liq vaziyat yuzasidan umumiy bayonot berdi.

«Biz soliq qarzi bo‘lgan mijozlarga yordam berishga qaratilgan yondashuvni qo‘llaymiz va bizga murojaat qilganlarga qarzdan chiqishda imkon qadar ko‘maklashamiz. Masalan, bo‘lib-bo‘lib to‘lash rejalarini taklif qilamiz. Bankrotlik to‘g‘risidagi arizaga esa faqat eng so‘nggi chora sifatida murojaat qilamiz», — dedi HMRC vakili.

Vaziyatdan xabardor manbalar muammo tez orada hal etilishini kutmoqda.

Karrager 2013 yilda futbolchilik faoliyatini yakunlagan va shundan buyon Premyer-liganing eng taniqli ekspertlaridan biriga aylangan.

Sky Sports’dagi faoliyatidan tashqari, u Gari Nevillga tegishli The Overlap prodyuserlik kompaniyasining Stick to Football podkastida ham muntazam qatnashadi.