«Buxoro» hujumchisi Shahzod Ubaydullayev O‘zbekiston Superligasi 19-turining eng chiroyli goli muallifi deb topildi. Futbolchi «Qo‘qon-1912»ga qarshi safar uchrashuvining so‘nggi daqiqalarida jarima zarbasini to‘g‘ridan-to‘g‘ri darvozaga yo‘llab, jamoasini mag‘lubiyatdan qutqargan edi.

24 avgust kuni Qo‘qonda o‘tkazilgan bahsda mezbonlar 49-daqiqada Javohir Siddiqovning penaltidan urgan goli evaziga hisobda oldinga chiqdi. 88-daqiqada esa «Buxoro» himoyachisi Sardor Qulmatov maydondan chetlatildi va mehmonlar o‘n kishi bo‘lib qoldi.

Shunga qaramay, 90+2-daqiqada Ubaydullayev uzoq masofadan belgilangan jarima zarbasini o‘ng oyoqda kuchli va aniq amalga oshirib, hisobni tenglashtirdi — 1:1. Mazkur gol nafaqat turning eng chiroyli to‘pi sifatida e’tirof etildi, balki «Buxoro»ga safardan bir ochko olib qaytish imkonini ham berdi.

Ubaydullayev joriy mavsumda yana bir e’tiborli natija qayd etgan — uning 5-turda «Surxon» darvozasiga kiritgan to‘pi Superliga-2026 mavsumining yubiley, 100-goli bo‘lgan edi.