«Бухоро» ҳужумчиси Шаҳзод Убайдуллаев Ўзбекистон Суперлигаси 19-турининг энг чиройли голи муаллифи деб топилди. Футболчи «Қўқон-1912»га қарши сафар учрашувининг сўнгги дақиқаларида жарима зарбасини тўғридан-тўғри дарвозага йўллаб, жамоасини мағлубиятдан қутқарган эди.
24 август куни Қўқонда ўтказилган баҳсда мезбонлар 49-дақиқада Жавоҳир Сиддиқовнинг пенальтидан урган голи эвазига ҳисобда олдинга чиқди. 88-дақиқада эса «Бухоро» ҳимоячиси Сардор Қулматов майдондан четлатилди ва меҳмонлар ўн киши бўлиб қолди.
Шунга қарамай, 90+2-дақиқада Убайдуллаев узоқ масофадан белгиланган жарима зарбасини ўнг оёқда кучли ва аниқ амалга ошириб, ҳисобни тенглаштирди — 1:1. Мазкур гол нафақат турнинг энг чиройли тўпи сифатида эътироф этилди, балки «Бухоро»га сафардан бир очко олиб қайтиш имконини ҳам берди.
Убайдуллаев жорий мавсумда яна бир эътиборли натижа қайд этган — унинг 5-турда «Сурхон» дарвозасига киритган тўпи Суперлига-2026 мавсумининг юбилей, 100-голи бўлган эди.
