«Barselona» vingeri Lamin Yamal klub va Ispaniya terma jamoasi safida o‘tkazgan so‘nggi 8 ta rasmiy uchrashuvida gol ham urmadi, golli uzatma ham amalga oshirmadi. Bu 19 yoshli futbolchining professional faoliyatidagi eng uzoq bunday seriya hisoblanadi.
Yamal so‘nggi bor 21 iyun kuni Jahon chempionati guruh bosqichida Saudiya Arabistoniga qarshi o‘yinda samarali harakat qayd etgan — u Ispaniyaning 4:0 hisobidagi g‘alabasida gol urgan. Shundan keyin u Urugvay, Avstriya, Portugaliya, Belgiya, Fransiya va Argentinaga qarshi Jahon chempionati bahslarida gol yoki assist qayd etmadi.
Seriya yangi klub mavsumida ham davom etdi. Yamal La Liganing «Elche»ga qarshi 5:0 va «Atletik»ka qarshi 2:0 hisobida yakunlangan uchrashuvlarida ham samarali harakat bilan ajralib tura olmadi. Shu tariqa, uning rasmiy o‘yinlardagi natijasiz seriyasi 8 ta bahsga yetdi.
Shu bilan birga, bu hisobga mavsumoldi o‘rtoqlik uchrashuvlari kirmaydi. Yamal 16 avgust kuni «Bazel»ga qarshi nazorat bahsida bir gol va bir assist qayd etgan edi.
