«Dinamo» futbolchisi Sanjar Qodirqulov chap oyoq tizzasidan jarrohlik amaliyotini muvaffaqiyatli o‘tkazdi.
Qodirqulov «Xorazm»ga qarshi uchrashuvda jamoasini muqarrar goldan saqlab qolgan epizodda jarohat olgan va safdan chiqqan edi.
Klub tibbiy bo‘limi tavsiyasiga ko‘ra, futbolchi dastlab yakka tartibda yengil mashg‘ulotlar olib bordi. Biroq keyingi tekshiruvlardan so‘ng jarohatni jarrohlik yo‘li bilan davolash zarur, degan xulosaga kelindi.
Sanjar Qodirqulovga chap tizzaning lateral meniski yirtilishi tashxisi qo‘yildi va jarrohlik amaliyoti muvaffaqiyatli o‘tkazildi.
«Dinamo» bosh shifokori Izzat Abduvohidovning ma’lum qilishicha, Qodirqulovning jarohatdan to‘liq tiklanib, safga qaytishi uchun taxminan bir oydan ko‘proq vaqt talab etiladi.
