Londonning «Arsenal» klubi hujumchisi Gabriel Jezus Madridning «Atletiko» jamoasiga o‘tishi mumkin.

«Kanonirlar» kelasi yil yozida shartnomasi yakunlanadigan braziliyalik futbolchini sotishga tayyor. Jurnalist Matteo Moretto ma’lumotiga ko‘ra, hujumchining xizmatlari «Atletiko»ga taklif qilingan va tomonlar o‘rtasida dastlabki muzokaralar ham o‘tkazilgan.

Jezusning ehtimoliy transfer qiymati 18-20 million yevro atrofida baholanmoqda. Shuningdek, bu kelishuv Xulian Alvaresning «Arsenal»ga ehtimoliy o‘tishi bilan hech qanday bog‘liq bo‘lmaydi.

Avvalroq Gabriel Jezusga «Napoli», «Everton», «Ipsvich» va «Beshiktash» klublari ham qiziqish bildirgani xabar qilingan edi.

Transfermarkt portali 29 yoshli futbolchining bozor qiymatini 17 million yevro deb baholamoqda.