Gana terma jamoasi himoyachisi Kodjo Pepra Oppong «Nissa»dan «Fenerbaxche»ga o‘tdi. Yangi futbolchining rasmiy taqdimoti 29 avgust, shanba kuni bo‘lib o‘tadi.

Oppong Fransiya klubi bilan xayrlashar ekan, ijtimoiy tarmoqda ta’sirli murojaat qoldirdi.

«Bu klub va bu yil men uchun qanchalik muhim bo‘lganini so‘z bilan ifodalash qiyin. Bu yerda o‘tkazgan har bir daqiqamdan zavq oldim va ajoyib tajriba orttirdim — jamoa bilan kundalik lahzalardan tortib, unutilmas xotiralargacha. Ayniqsa, Fransiya kubogi finaliga chiqqanimizni hech qachon unutmayman.

Ammo futboldan tashqari, bu yo‘lda uchratgan insonlarimdan eng ko‘p minnatdorman. Bu yerga futbolchi sifatida keldim, endi esa men uchun aka-ukadek bo‘lib qolgan do‘stlar bilan ketyapman.

Xotiralar, kulgilar, kurashlar, g‘alabalar va hatto og‘ir damlar ham men bilan abadiy qoladi. Men bu klubni, bu shaharni va «Nissa»ni shunday o‘ziga xos qiladigan insonlarni sevib qoldim.

Faoliyatim meni qayerga olib bormasin, bu klub har doim qalbimda qoladi», — deb yozdi Oppong.

O‘tgan mavsumda himoyachi barcha musobaqalar doirasida 43 ta uchrashuvda maydonga tushib, 1 ta gol urdi. Shuningdek, u 2026 yilgi Jahon chempionatida ikki o‘yinda ishtirok etdi.