«Atletiko» Madrid hujumchisi Xulian Alvares Ispaniya chempionatining navbatdagi turida «Sevilya»ga qarshi o‘yinni o‘tkazib yuboradi.
«Matraschilar» matbuot xizmati bo‘lajak uchrashuv uchun qaydnomani e’lon qildi, ammo ro‘yxatda Xulian Alvares nomi yo‘q. Biroq bu kutilgan holat edi. Argentinalik futbolchi bir necha kun davomida o‘zini yaxshi his qilmagani sababli jamoa bilan mashg‘ulotlarda ishtirok etmadi. Keyinroq «Atletiko» bosh murabbiyi Diyego Simeone matbuot anjumanida Alvares «Sevilya»ga qarshi o‘yinni o‘tkazib yuborishini ma’lum qildi.
Mish-mishlarga ko‘ra, hujumchi transfer oynasi yopilishiga qolgan so‘nggi kunlarda ham «Barselona»ga o‘tish umidini saqlab qolmoqda. Shuningdek, u «Arsenal»ga o‘tish variantini ko‘rib chiqmayotgani xabar qilingan.
La Liganing 3-turidan o‘rin olgan «Sevilya» — «Atletiko» uchrashuvi 29 avgust kuni bo‘lib o‘tadi va Toshkent vaqti bilan 00:30 da boshlanadi.
