«Атлетико» Мадрид ҳужумчиси Хулиан Альварес Испания чемпионатининг навбатдаги турида «Севилья»га қарши ўйинни ўтказиб юборади.
«Матрасчилар» матбуот хизмати бўлажак учрашув учун қайдномани эълон қилди, аммо рўйхатда Хулиан Альварес номи йўқ. Бироқ бу кутилган ҳолат эди. Аргентиналик футболчи бир неча кун давомида ўзини яхши ҳис қилмагани сабабли жамоа билан машғулотларда иштирок этмади. Кейинроқ «Атлетико» бош мураббийи Диего Симеоне матбуот анжуманида Альварес «Севилья»га қарши ўйинни ўтказиб юборишини маълум қилди.
Миш-мишларга кўра, ҳужумчи трансфер ойнаси ёпилишига қолган сўнгги кунларда ҳам «Барселона»га ўтиш умидини сақлаб қолмоқда. Шунингдек, у «Арсенал»га ўтиш вариантини кўриб чиқмаётгани хабар қилинган.
Ла Лиганинг 3-туридан ўрин олган «Севилья» — «Атлетико» учрашуви 29 август куни бўлиб ўтади ва Тошкент вақти билан 00:30 да бошланади.
