“Pari Sen-Jermen” Fransiya chempionatining 1-turida “Renn”ga qarshi uchrashuvni ko‘chirgani uchun 150 ming yevro miqdorida jarimaga tortildi. Bu haqda turnirni boshqaruvchi tashkilot — mamlakat Professional futbol ligasi matbuot xizmati xabar berdi.

Mazkur qaror klublarning maydon holati va zaxira stadion mavjudligi bo‘yicha majburiyatlarini belgilovchi moddani buzganlik sababli qabul qilingan.

Ma’lumot uchun, “PSJ” va “Renn” o‘rtasidagi uchrashuv maydonning yomon holati sabab Parijdan boshqa shaharga ko‘chirilgan edi. Bahs 23-avgust kuni “Renn”ning uy stadionida bo‘lib o‘tgan va 2:2 hisobidagi durang bilan yakunlangan.

Avvalroq Madridning “Real” klubi Portugaliya terma jamoasi va “PSJ”ning 26 yoshli yarimhimoyachisi Vitinya transferi bo‘yicha parijliklarga 150 mln yevrolik taklif yuborgani xabar qilingan edi.