«Gamburg» bosh murabbiyi Merlin Polsin Fabiu Viyeyrani jamoaga qaytarish katta kuch bo‘lishini ta’kidladi. Biroq «Arsenal» bilan muzokaralar hozircha yakuniga yetmagan.

Viyeyra o‘tgan mavsumni «Gamburg»da ijara asosida o‘tkazib, Bundesligada 29 ta uchrashuvda maydonga tushgan va gol hamda golli uzatmalar hisobiga jami 11 ta samarali harakat qayd etgan.

Uning o‘yini Polsinda juda yaxshi taassurot qoldirgan va murabbiy portugaliyalik yarim himoyachi Bundesligaga qaytgan «Gamburg» uchun yana muhim futbolchi bo‘lishi mumkin, deb hisoblamoqda.

«Men buni ko‘p marta aytganman: Fabiu o‘tgan mavsumda bizga juda ko‘p ajoyib lahzalarni taqdim etdi. U juda yuqori saviyadagi futbolchi. Bundan tashqari, u jamoaga juda yaxshi moslashgan va o‘ziga xos jihatlarni olib kiradi», — dedi Polsin.

«Men ba’zan nazorat qila olmaydigan narsalar haqida ortiqcha o‘ylamaslikka harakat qilaman. Agar u qaytib kelsa, bu biz uchun juda katta kuch bo‘lardi», — deya qo‘shimcha qildi mutaxassis.

«Gamburg» ayni paytda «Arsenal» bilan kelishuvga erishish ustida ishlamoqda, ammo hozircha London klubi belgilagan transfer narxini qondirgani yo‘q.