«Gamburg» «Arsenal» yarim himoyachisi Fabiu Viyeyrani to‘liq sotib olish bo‘yicha muzokaralarning ilg‘or bosqichiga yetdi. Bitim qiymati taxminan 10 million yevroni tashkil etishi mumkin.

BBC ma’lumotiga ko‘ra, London klubi transfer oynasi seshanba kuni yopilishidan oldin 26 yoshli portugaliyalik futbolchini sotishni istamoqda. «Arsenal»da tomonlar kelishuvga erisha olishiga ishonch ortib bormoqda.

«Arsenal» Viyeyrani 2022 yilda «Portu»dan qariyb 40 million yevroga xarid qilgan edi. Biroq yarim himoyachi London klubi asosiy tarkibidan mustahkam joy ola olmadi.

Viyeyra «Arsenal» safida jami 47 ta uchrashuv o‘tkazgan. Shundan APLda atigi 5 marta asosiy tarkibda maydonga tushgan.

Portugaliyalik futbolchi o‘tgan mavsumni «Gamburg»da ijara asosida o‘tkazdi. U Bundesligada 29 ta uchrashuvda 7 ta gol urdi.