«Fiorentina» Villi Nyonto transferi bo‘yicha «Lids Yunayted» bilan og‘zaki kelishuvga erishdi. Bu haqda insayder Fabrisio Romano xabar berdi.

Manba ma’lumotiga ko‘ra, italiyalik hujumchi seshanba kuni tibbiy ko‘rikdan o‘tadi. Bitim ijara shaklida amalga oshiriladi.

Shu bilan birga, «Lids» kelishuvga «Fiorentina» uchun futbolchini kelasi yozda to‘liq sotib olish huquqini kiritishga rozi bo‘lgan.

Ijara davri mobaynida 22 yoshli Nyontoning maoshini «Fiorentina» to‘liq to‘laydi.

Tomonlar o‘rtasidagi muzokaralardan so‘ng aynan shunday format ma’qullangan: bu Nyontoga Italiya futboliga qaytish imkonini beradi, «Fiorentina» esa futbolchini bir mavsum davomida kuzatib, keyin uni to‘liq xarid qilish-qilmaslik bo‘yicha qaror qabul qiladi.