«Brayton» «Milluoll» hujumchisi Femi Azizni transfer qilish bo‘yicha muzokaralarni davom ettirmoqda va kelishuv yakunlanishiga yaqin qoldi.

25 yoshli futbolchi uchun «Brayton» avval ikki marta taklif bilan chiqqan, biroq «Milluoll» har ikki taklifni rad etgan.

Endi tomonlar umumiy qiymati 25 million funtga baholanayotgan transfer bo‘yicha kelishuvga yaqinlashgan: «Brayton» 15 million funt to‘laydi, shuningdek, «Milluoll»ga taxminan 10 million funtga baholanayotgan yosh futbolchisini ham beradi.

Ayni paytda «Brayton»ga o‘tishni istayotgan Aziz o‘tgan mavsum Chempionshipda 11 ta gol urgan va 7 ta golli uzatmani amalga oshirgan.

Futbolchining «Milluoll» bilan shartnomasi tugashiga ikki yil qolgani bois, londonliklar uni hozir sotish orqali katta foyda olish imkoniyatiga ega. Klub Azizni 2024 yilda «Riding»dan atigi 1 million funtga sotib olgan edi.

Hozirda Aziz jarohati sabab maydonga tushmayapti, ammo uning yaqin orada safga qaytishi kutilmoqda.