«Barselona» bosh murabbiyi Xans-Diter Flik La Liga doirasida «Rayo Valyekano» ustidan qozonilgan 5:2 hisobidagi yirik g‘alabadan so‘ng jamoasi o‘yiniga baho berdi.

Nemis mutaxassisi hisobda katta ustunlikka ega bo‘lgan paytda ham jamoa o‘yin nazoratini saqlab qolishi kerakligini ta’kidladi.

«Bugun bizga oson bo‘lmadi. Oldinda hali juda ko‘p o‘yinlar bor va hatto hisob 3:1 bo‘lib turganida ham bahsni nazorat qilishni o‘rganishimiz kerak.

Futbolchilarning imkon qadar ko‘proq gol urishga intilishi yaxshi, albatta. Lekin shu bilan birga o‘yin nazoratini saqlab qolish ham juda muhim», — dedi Flik.

«Barselona» ustozi birinchi bo‘limdagi o‘yin va jamoaning o‘tkazib yuborilgan dastlabki golga munosabatidan mamnunligini ham bildirdi.

«Birinchi bo‘limni juda yaxshi o‘tkazdik. Birinchi golni o‘tkazib yuborganimizdan keyin jamoa qanday javob qaytarganidan mamnunman.

Shu bilan birga, standart vaziyatlardagi o‘yinimizni yaxshilashimiz kerak, deb hisoblayman. Bu borada o‘sishimiz uchun hali imkoniyat juda katta», — dedi mutaxassis.

Flikning so‘zlarini Barca Universal keltirdi.

Ushbu g‘alabadan so‘ng «Barselona» uch turda 9 ochko jamg‘arib, La Liga turnir jadvalida yana peshqadamlikka qaytdi.