Belgiyalik yarim himoyachi Marten de Ron «Roma» futbolchisi sifatida tanishtirilganidan so‘ng klub muxlislaridan uzr so‘radi.

Bunga 2023 yilda sodir bo‘lgan voqea sabab bo‘ldi. O‘sha paytda «Roma» va «Feyenoord» Yevropa ligasida o‘zaro to‘qnash kelgan, de Ron esa ijtimoiy tarmoqda rimliklar muxlislariga qaratilgan haqoratomuz ishora aks etgan postni e’lon qilgan edi.

Futbolchi o‘tmishda «Feyenoord» safida to‘p tepgani uchun o‘sha qarama-qarshilikda Rotterdam klubini qo‘llab-quvvatlagan.

Endi esa «Roma»ga o‘tgan de Ron o‘sha harakati uchun afsusda ekanini bildirib, muxlislardan kechirim so‘radi.

«Men ijtimoiy tarmoqlardan juda ko‘p foydalanaman va u yerda do‘stlarim bilan turli narsalarni bo‘lishaman. Ammo o‘sha safar me’yordan oshib ketganim aniq. Endi barcha muxlislardan uzr so‘ramoqchiman», — dedi de Ron.

Uning so‘zlarini derbyderbyderby.it keltirdi.

Marten de Ron bunga qadar «Atalanta» safida to‘p tepib kelgan.