Fransiya terma jamoasi va «Roma» yarim himoyachisi Manu Kone Angliya Premyer-ligasining top-klublaridan biriga o‘tishi mumkin.
Insayder Nikolo Skira ijtimoiy tarmoqlarda xabar berishicha, xavbekni o‘z safiga qo‘shib olishga Londonning «Chelsi» klubi urinib ko‘rdi. «Chelsi» fransuz futbolchisining transferi uchun «Roma»ga 65 million yevro taklif qildi. Endi qaror futbolchi va «Roma» rahbariyatiga bog‘liq.
25 yoshli yarim himoyachi o‘tgan mavsumda A Seriyada 29 ta o‘yinda maydonga tushdi. Manu 2 ta gol urdi, 3 ta golli uzatma amalga oshirdi va 2 ta sariq kartochka oldi. Uning «Roma» bilan shartnomasi 2029 yil iyun oyi oxirigacha amal qiladi.
