"Barsa Atletik" tarkibni kuchaytirish ishlarini davom ettirmoqda. Jamoaning asosiy maqsadi — Primera Federasionga yo‘llanma olish uchun kurashish.
Transfer oynasining so‘nggi bosqichida kataloniyaliklar "Real Betis" yoshlar jamoasida to‘p surayotgan markaziy himoyachi Jan Emmanuel N'Goranga qiziqish bildirmoqda.
Yosh himoyachi "Barselona" vakillariga avvaldan yaxshi tanish. U "Betis" yoshlar jamoasi safida UYEFA Yoshlar ligasida yaxshi taassurot qoldirgan, hatto kataloniyaliklarga qarshi uchrashuvda gol ham urgan edi.
Cazurreando jurnalisti Anxel Garsiya ma’lumotiga ko‘ra, "Barselona" N'Goran transferini tezroq yakunlash va "Barsa Atletik"ning markaziy himoya chizig‘ini kuchaytirishga harakat qilmoqda.
Biroq muzokaralar oson kechmasligi mumkin. Chunki futbolchiga "Rayo Valyekano" ham qiziqish bildirgan. Madrid klubi yosh himoyachiga asosiy jamoadan o‘rin olish uchun to‘g‘ridan-to‘g‘ri kurashish imkoniyatini taklif qilmoqchi.
Qayd etilishicha, "Betis" avvalroq N'Goran bo‘yicha "Albasete" va "Kordoba"dan tushgan takliflarni rad etgan. Biroq "Barselona" va "Rayo Valyekano"ning kurashga qo‘shilishi futbolchining kelajagi borasida vaziyatni o‘zgartirishi mumkin.
N'Goranning ehtimoliy transferi "Barsa Atletik"da yoz davomida amalga oshirilgan katta tarkibiy o‘zgarishlarning davomi bo‘ladi. Jamoa bu yozda Joni Ernandes, Xuan Ibarra, Ignasi Ker, Xavi Kastro, Xosue Kaysedo, Patrisio Pasifiko, Aziz Issa va Mirza Katovich kabi futbolchilarni o‘z safiga qo‘shib olgan.
"Barselona" markaziy himoyachi uchun kurashda g‘olib chiqishi va transfer oynasi yopilishi arafasida yoshlar tizimi uchun yana bir muhim kelishuvni yakunlashiga ishonmoqda.
