"Барса Атлетик" таркибни кучайтириш ишларини давом эттирмоқда. Жамоанинг асосий мақсади — Примера Федерасионга йўлланма олиш учун курашиш.

Трансфер ойнасининг сўнгги босқичида каталонияликлар "Реал Бетис" ёшлар жамоасида тўп сураётган марказий ҳимоячи Жан Эммануэль Н'Горанга қизиқиш билдирмоқда.

Ёш ҳимоячи "Барселона" вакилларига аввалдан яхши таниш. У "Бетис" ёшлар жамоаси сафида УЕФА Ёшлар лигасида яхши таассурот қолдирган, ҳатто каталонияликларга қарши учрашувда гол ҳам урган эди.

Cazurreando журналисти Анхель Гарсия маълумотига кўра, "Барселона" Н'Горан трансферини тезроқ якунлаш ва "Барса Атлетик"нинг марказий ҳимоя чизиғини кучайтиришга ҳаракат қилмоқда.

Бироқ музокаралар осон кечмаслиги мумкин. Чунки футболчига "Райо Вальекано" ҳам қизиқиш билдирган. Мадрид клуби ёш ҳимоячига асосий жамоадан ўрин олиш учун тўғридан-тўғри курашиш имкониятини таклиф қилмоқчи.

Қайд этилишича, "Бетис" аввалроқ Н'Горан бўйича "Альбасете" ва "Кордоба"дан тушган таклифларни рад этган. Бироқ "Барселона" ва "Райо Вальекано"нинг курашга қўшилиши футболчининг келажаги борасида вазиятни ўзгартириши мумкин.

Н'Гораннинг эҳтимолий трансфери "Барса Атлетик"да ёз давомида амалга оширилган катта таркибий ўзгаришларнинг давоми бўлади. Жамоа бу ёзда Жони Эрнандес, Хуан Ибарра, Игнаси Кер, Хави Кастро, Хосуэ Кайседо, Патрисио Пасифико, Азиз Исса ва Мирза Катович каби футболчиларни ўз сафига қўшиб олган.

"Барселона" марказий ҳимоячи учун курашда ғолиб чиқиши ва трансфер ойнаси ёпилиши арафасида ёшлар тизими учун яна бир муҳим келишувни якунлашига ишонмоқда.