Italiya matbuoti oddiy, ammo e’tiborli bir faktdan mamnun: A Seriyaning dastlabki ikki turida birorta ham 0:0 hisobidagi durang qayd etilmadi.

O‘tkazilgan 20 ta uchrashuvning har birida muxlislar kamida bitta gol ko‘rishdi. To‘g‘ri, shularning oltitasida faqat bittadan gol urildi.

Har qanday holatda ham bu o‘tgan mavsumga nisbatan ijobiy o‘zgarish. O‘shanda chempionatning dastlabki o‘yinidayoq «Jenoa» va «Lechche» 0:0 hisobida durang o‘ynagan edi. Qolaversa, 12-turga qadar deyarli har bir turda kamida bitta 0:0 natija qayd etilgan. Ayrim turlarda, xususan 11-turda, bunday o‘yinlar bir nechta bo‘lgan.

derbyderbyderby.it ma’lumotiga ko‘ra, bunday o‘zgarish qisman hakamlik uslubi bilan ham bog‘liq. Hozirda italiyalik hakamlarga o‘yinni tez-tez to‘xtatmaslik va futbolchilarga ko‘proq kurashish imkonini berish tavsiya qilinmoqda. Bu Yevropa futbolida keng qo‘llaniladigan uslubga yaqinlashish sifatida baholanmoqda.