Италия матбуоти оддий, аммо эътиборли бир фактдан мамнун: А Сериянинг дастлабки икки турида бирорта ҳам 0:0 ҳисобидаги дуранг қайд этилмади.

Ўтказилган 20 та учрашувнинг ҳар бирида мухлислар камида битта гол кўришди. Тўғри, шуларнинг олтитасида фақат биттадан гол урилди.

Ҳар қандай ҳолатда ҳам бу ўтган мавсумга нисбатан ижобий ўзгариш. Ўшанда чемпионатнинг дастлабки ўйинидаёқ «Женоа» ва «Лечче» 0:0 ҳисобида дуранг ўйнаган эди. Қолаверса, 12-турга қадар деярли ҳар бир турда камида битта 0:0 натижа қайд этилган. Айрим турларда, хусусан 11-турда, бундай ўйинлар бир нечта бўлган.

derbyderbyderby.it маълумотига кўра, бундай ўзгариш қисман ҳакамлик услуби билан ҳам боғлиқ. Ҳозирда италиялик ҳакамларга ўйинни тез-тез тўхтатмаслик ва футболчиларга кўпроқ курашиш имконини бериш тавсия қилинмоқда. Бу Европа футболида кенг қўлланиладиган услубга яқинлашиш сифатида баҳоланмоқда.