“Barselona” hujumchisi Lamin Yamal Ispaniya futbolchilari assosiasiyasi tomonidan La Liganing 2025/26-yilgi mavsumdagi eng yaxshi futbolchisi deb topildi. Bu Yamalning ketma-ket ikkinchi mavsum ushbu sovrinni qo‘lga kiritishi bo‘ldi. 19 yoshli futbolchi mukofotni Madridda bo‘lib o‘tgan marosimda qabul qilib oldi.

Taqdirlash marosimidan so‘ng Yamal mikst-zonada jurnalistlar bilan suhbatlashdi. U sovrinni qo‘lga kiritgani haqidagi fikrlari bilan o‘rtoqlashib, “Barselona”ga oid bir qator mavzularga to‘xtaldi, shuningdek, hozirgi sport formasi va jamoa bilan erishmoqchi bo‘lgan maqsadlari haqida gapirdi.

“Biz hamma sovrinlarni qo‘lga kiritishni xohlaymiz. Biz uchun eng muhimi ham shu”, deydi “Barselona” hujumchisi.

Yozgi transfer oynasi yopilishidan oldin “Atletiko” hujumchisi Xulian Alvares “Barselona”ga mos tushishi mumkinmi, degan savolga Yamal quyidagicha javob berdi.

“Hozir bizda hammasi yaxshi, buni ko‘rib turibsiz. Yetarlicha gol uryapmiz. U ajoyib futbolchi ekani aniq, ammo men tarkibimizdan juda mamnunman”.

Shuningdek, Yamal “Barselona”ning hujum uchligi “Real Madrid”nikidan kuchlimi, degan savolga aniq javob bermadi.

“Bu raqobat masalasi emas. Ammo biz hamma sovrinlarni qo‘lga kiritishni xohlaymiz”, dedi ispaniyalik iqtidor.

G‘olib professional futbolchilarning ovoz berishi orqali aniqlandi. Ular Yamalni o‘tgan mavsumning eng yaxshi futbolchisi sifatida e’tirof etishdi. Mazkur mukofotning ahamiyati shundaki, u professional darajada to‘p surayotgan futbolchilarning o‘z hamkasbiga bergan bahosi hisoblanadi.

Ma’lumot uchun, Yamal Ispaniya terma jamoasi bilan 2026-yilgi mundialda zafar quchdi. “Qizil furiya” chempionlik yo‘lida Portugaliya, Belgiya, Fransiya va Argentina kabi top-jamoalarni mag‘lub etishga muvaffaq bo‘ldi.