Yarim himoyachi Frank Kessyening agenti Jorj Atangana bayonot berib, «Yuventus» rahbariyatini ivuarlik futbolchining yozgi transferi amalga oshmay qolishida aybladi.

Uning so‘zlariga ko‘ra, futbolchi bir necha oy davomida «byankonerilar»dan taklif kutib, katta moliyaviy imtiyozlarga ham rozi bo‘lgan. Biroq yakunda klub tomonidan haqiqiy qiziqish yo‘qligiga duch kelgan.

«Frank “Yuventus” futbolkasida o‘ynashni qanchalik istaganini faktlar va katta moliyaviy qurbonliklari bilan isbotladi. U boshqa klublarning bir nechta taklifini rad etdi, ularning ayrimlarini hech bir futbolchi rad eta olmaydigan darajada jozibali edi», — dedi agent.

Atangana «Yuventus» bosh direktori Jovanni Karnevalining Kessye va uning vakili klubga o‘tishni yetarlicha istamagani haqidagi so‘zlarini ham rad etdi.

Yakunda 29 yoshli yarim himoyachi «Atalanta» bilan 3 yillik shartnoma imzoladi. Kelishuvda shartnomani yana bir mavsumga uzaytirish imkoniyati mavjud.

Atangananing ta’kidlashicha, Bergamo klubida Kessyeni ham shaxs sifatida, ham futbolchi sifatida qadrlashgan va muzokaralarda moliyaviy masala hech qachon birinchi o‘rinda bo‘lmagan.