Ярим ҳимоячи Франк Кессьенинг агенти Жорж Атангана баёнот бериб, «Ювентус» раҳбариятини ивуарлик футболчининг ёзги трансфери амалга ошмай қолишида айблади.

Унинг сўзларига кўра, футболчи бир неча ой давомида «бьянконерилар»дан таклиф кутиб, катта молиявий имтиёзларга ҳам рози бўлган. Бироқ якунда клуб томонидан ҳақиқий қизиқиш йўқлигига дуч келган.

«Франк “Ювентус” футболкасида ўйнашни қанчалик истаганини фактлар ва катта молиявий қурбонликлари билан исботлади. У бошқа клубларнинг бир нечта таклифини рад этди, уларнинг айримларини ҳеч бир футболчи рад эта олмайдиган даражада жозибали эди», — деди агент.

Атангана «Ювентус» бош директори Жованни Карневалининг Кессье ва унинг вакили клубга ўтишни етарлича истамагани ҳақидаги сўзларини ҳам рад этди.

Якунда 29 ёшли ярим ҳимоячи «Аталанта» билан 3 йиллик шартнома имзолади. Келишувда шартномани яна бир мавсумга узайтириш имконияти мавжуд.

Атангананинг таъкидлашича, Бергамо клубида Кессьени ҳам шахс сифатида, ҳам футболчи сифатида қадрлашган ва музокараларда молиявий масала ҳеч қачон биринчи ўринда бўлмаган.