Chempionlar ligasida ilk bor ishtirok etayotgan futbolchilar uchun maxsus farqlovchi belgi joriy etiladi.

Yangi tartibga ko‘ra, turnirdagi birinchi uchrashuvini o‘tkazayotgan futbolchi formasining yeng qismida "Debyut" yozuvi tushirilgan maxsus nishonlar bilan maydonga tushadi.

Agar futbolchi Chempionlar ligasidagi debyutini zaxira o‘rindig‘idan boshlab, keyin o‘yinga qo‘shilish orqali amalga oshirsa, u ham maydonga tushish paytida ushbu maxsus nishon bilan chiqadi.

Yangilik 2026/27 yilgi mavsumdan boshlab amal qiladi. Bu UEFA va Amerikaning Fanatics sport platformasi o‘rtasidagi hamkorlik kelishuvi doirasida yo‘lga qo‘yiladi.

Uchrashuvdan keyin futbolchilar taqqan nishonlar Topps kolleksion kartochkalar ishlab chiqaruvchisiga topshiriladi. Kompaniya ularni futbolchilar imzosi tushirilgan maxsus eksklyuziv kartochkalar to‘plamiga integrasiya qiladi.

Kutilishicha, 2027/28 yilgi mavsumdan boshlab xuddi shunday "Debyut" nishonlari ayollar Chempionlar ligasida ham paydo bo‘ladi.