Hujumchi Pyer-Emerik Obameyang Gabon terma jamoasidagi faoliyatini yakunlaganini ma’lum qildi.

Yanvar oyida Gabon Afrika kubogida guruhda birorta ham ochko to‘play olmay, musobaqani tark etgan edi. Shundan so‘ng mamlakat hukumati Tyerri Muyumaning murabbiylar shtabini tarqatish, terma jamoa faoliyatini keyingi xabarga qadar to‘xtatish, shuningdek, Bryuno Ekyuel-Manga va Pyer-Emerik Obameyangni jamoadan chetlatish haqida qaror qabul qildi.

Bir necha kun o‘tib, bu choralar qisman bekor qilindi va Obameyang terma jamoaga qaytishi mumkin edi.

«Ular meni tahqirlashdi va obro‘yimga putur yetkazishdi, holbuki, men Afrika kubogida jarohat bilan o‘ynagan edim.

Bu so‘nggi tomchi bo‘ldi va men shu yerda to‘xtashni ma’qul ko‘raman», — dedi Obameyang seshanba kuni televideniye orqali bergan intervyusida.

37 yoshli hujumchi Gabon terma jamoasi tarixidagi eng yaxshi to‘purar hisoblanadi. U shuningdek, terma jamoa sardori ham bo‘lgan.